याम्बालिङ्ग हाइड्रोपावर लिमिटेडले आज वैशाख १६ गतेदेखि सर्वसाधारण लगानीकर्ताका लागि प्राथमिक शेयर (आईपीओ) निष्काशन तथा बिक्री खुला गरेको छ। कम्पनीले दोस्रो चरणअन्तर्गत सर्वसाधारणका लागि कुल १७ लाख ४३ हजार कित्ता साधारण शेयर सार्वजनिक निष्काशनमा ल्याएको हो।

कम्पनीले कुल ७० करोड रुपैयाँ जारी पूँजीको ४० प्रतिशत बराबर २८ लाख कित्ता आईपीओ निष्काशन गर्न नेपाल धितोपत्र बोर्डबाट अनुमति पाएको थियो। यसमध्ये आयोजना प्रभावित स्थानीय बासिन्दाका लागि ७ लाख कित्ता, वैदेशिक रोजगारीमा रहेका नेपालीका लागि २ लाख १० हजार कित्ता, सामूहिक लगानी कोषका लागि १ लाख ५ हजार कित्ता र कम्पनीका कर्मचारीका लागि ४२ हजार कित्ता शेयर यसअघि नै छुट्याएर बाँडफाँट गरिसकिएको छ।

अब बाँकी रहेको १७ लाख ४३ हजार कित्ता शेयर सर्वसाधारण लगानीकर्ताका लागि आजदेखि बिक्री खुला गरिएको हो। लगानीकर्ताले न्यूनतम १० कित्ता र अधिकतम २१ हजार कित्तासम्म आवेदन दिन सक्नेछन्।

यो आईपीओमा वैशाख २२ गते बैंकिङ समयसम्म आवेदन दिन सकिनेछ। सो अवधिसम्म पूर्ण आवेदन नपरेमा निष्काशन अवधि थप हुन सक्ने व्यवस्था पनि कम्पनीले जनाएको छ।

निष्काशन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडले सम्हालेको छ। योग्य लगानीकर्ताले नेपाल धितोपत्र बोर्डबाट स्वीकृत सम्पूर्ण आस्बा सदस्य बैंक तथा वित्तीय संस्था, तिनका शाखा कार्यालयहरू तथा ‘मेरो शेयर’ अनलाइन प्रणालीमार्फत आवेदन दिन सक्नेछन्।

नेपाल धितोपत्र बोर्डले कम्पनीलाई फागुन १७ गते आईपीओ निष्काशनको अनुमति प्रदान गरेको थियो। कम्पनीले सिन्धुपाल्चोक जिल्लामा निर्माण गरेको ७.२७१ मेगावाट क्षमताको याम्बालिङ्ग खोला जलविद्युत आयोजना २०८० फागुन ८ गतेदेखि व्यावसायिक उत्पादनमा ल्याइसकेको छ।

ऊर्जा क्षेत्रमा सञ्चालनमा रहेको परियोजना भएकाले कम्पनीको उत्पादन सुरु भइसकेको अवस्था लगानीकर्ताका लागि महत्वपूर्ण पक्ष मानिएको छ। अब सर्वसाधारणमा शेयर निष्काशन खुलेसँगै ऊर्जा क्षेत्रको नयाँ कम्पनीमा प्रत्यक्ष लगानी गर्ने अवसर आम नागरिकलाई प्राप्त भएको छ।